श्रीलंकालाई हराउदै महिला एसिया कपको उपाधि भारतले जित्याे

सेतोमसी
भाद्र २९, २०८३ सोमवार

श्रीलंकालाई हराउदै महिला एसिया कपको उपाधि भारतले जित्याे

अ +
अ
अ -

काठमाडौँ । भारतले श्रीलंकालाई ७२ रनले पराजित गर्दै महिला एसिया कप क्रिकेटको उपाधि जितेको छ । दुबई अन्तर्राष्ट्रिय क्रिकेट रंगशालामा गएराति सम्पन्न फाइनलमा भारतले श्रीलंकालाई पराजित गर्दै आठौँ पटक एसिया कपको उपाधि जितेको हो ।

टस जितेर पहिले ब्याटिङ गरेको भारतले निर्धारित २० ओभरमा ५ विकेट गुमाएर १८३ रन बनाएको थियो । भारतका लागि शफाली वर्माले ३९ बलमा ६८ रनको आक्रामक पारी खेलेकी थिइन् । उनले २४ बलमै अर्धशतक पूरा गर्दै महिला एसिया कपको सबैभन्दा छिटो अर्धशतक बनाउने कीर्तिमानसमेत बनाएकी थिइन् ।

स्मृति मन्धानाले पनि ३९ बलमा ५९ रन बनाउँदै उत्कृष्ट ब्याटिङ गरेकी थिइन् । शफाली र मन्धानाले पहिलो विकेटका लागि १२९ रनको साझेदारी गर्दै भारतलाई बलियो सुरुआत दिलाएका थिए ।

भारतले दिएको १८४ रनको लक्ष्य पछ्याएको श्रीलंकाको ब्याटिङ भने भारतीय बलर सामु टिक्न सकेन । श्रीलंकाको टोली २० ओभरमा १११ रनमै अलआउट भएको थियो । श्रीलंकाका लागि कप्तान चमारी अटापट्टुले सर्वाधिक ३६ रन बनाएकी थिइन् ।

भारतकी श्री चरणीले उत्कृष्ट बलिङ गर्दै ४ विकेट लिएकी थिइन् भने दीप्ति शर्माले ३ विकेट हात पारेकी थिइन् । भारतीय बलरले लगातार दबाब बनाएपछि श्रीलंकाले लक्ष्यसम्म पुग्ने अवसर पाउन सकेन ।

यस जितसँगै भारतले महिला एसिया कपमा आफ्नो दबदबा कायम राख्दै आठौँ पटक उपाधि जितेको छ । भारत यसअघि सात पटक च्याम्पियन बनेको थियो । २०२४ को फाइनलमा श्रीलंकासँग पराजित भएको भारतले यसपटक फाइनलमै श्रीलंकालाई हराउँदै उपाधि आफ्नो पक्षमा पारेको हो ।