हुथीको आक्रमणपछि साउदी अरबले पूर्व–पश्चिम तेल पाइपलाइन बन्द गर्‍यो

सेतोमसी
भाद्र २७, २०८३ शनिवार

हुथीको आक्रमणपछि साउदी अरबले पूर्व–पश्चिम तेल पाइपलाइन बन्द गर्‍यो

अ +
अ
अ -

काठमाडौँ । मध्यपूर्वमा जारी युद्ध चर्किँदै गएपछि साउदी अरबले हवाई आक्रमणको निशानामा परेको आफ्नो महत्वपूर्ण पूर्व–पश्चिम तेल पाइपलाइन अस्थायी रूपमा बन्द गरेको छ ।

साउदी ऊर्जा मन्त्रालयका अनुसार सावधानीका रूपमा पाइपलाइन बन्द गरिएको हो । करिब १ हजार २ सय किलोमिटर लामो उक्त पाइपलाइनले दैनिक ४० देखि ५० लाख ब्यारेल कच्चा तेल ओसार्दै आएको थियो ।

साउदी र इराकका अनुसार पाइपलाइनमा भएको ड्रोन आक्रमण इराकबाट भएको थियो। आक्रमणपछि इराकले एक सैन्य कमान्डरलाई पदबाट हटाएको छ ।

यसैबीच, इरान समर्थित हुथी विद्रोहीले लाल सागरको महत्वपूर्ण बाब अल–मन्देब क्षेत्रमा आफ्नो नियन्त्रण बढाउँदै लगेका छन्। हुथीहरूले साउदी जहाजबाहेक अन्य जहाजको समुद्री आवागमन सुरक्षित रहेको बताएका छन् ।

साउदी अरबले हुथीविरुद्ध अमेरिकी सैन्य सहयोग मागेको भए पनि अमेरिकाले तत्काल प्रत्यक्ष सैन्य कारबाही गर्न अस्वीकार गर्दै सूचना आदानप्रदान र लक्ष्य पहिचानमा सहयोग गर्ने जनाएको छ ।

पाइपलाइन बन्द हुनु र लाल सागर तथा होर्मुज जलडमरूमध्यमा तेल ढुवानी प्रभावित भएपछि विश्व बजारमा तेल आपूर्तिमा थप दबाब पर्ने देखिएको छ ।