अन्तर्राष्ट्रिय

मलेसियामा १६ वर्षभन्दा कम उमेरका बालबालिकालाई सामाजिक सञ्जालमा खाता खोल्न रोक

सेतोमसी
जेठ १८, २०८३ सोमवार

मलेसियामा १६ वर्षभन्दा कम उमेरका बालबालिकालाई सामाजिक सञ्जालमा खाता खोल्न रोक

अ +
अ
अ -

काठमाडौँ । मलेसियाले १६ वर्षभन्दा कम उमेरका बालबालिकालाई सामाजिक सञ्जालमा खाता खोल्न रोक लगाउने नयाँ नियम लागू गरेको छ ।

नयाँ व्यवस्थाअनुसार फेसबुक, इन्स्टाग्राम, टिकटोक र युट्युबजस्ता सामाजिक सञ्जाल सञ्चालक कम्पनीहरूले प्रयोगकर्ताको उमेर प्रमाणीकरण गर्ने व्यवस्था अनिवार्य रूपमा गर्नुपर्नेछ । १६ वर्षभन्दा कम उमेरका प्रयोगकर्ताले नयाँ खाता खोल्न नपाउने प्रावधान राखिएको छ ।

नियम उल्लङ्घन गर्ने कम्पनीमाथि २५ लाख अमेरिकी डलरसम्म बराबरको जरिवाना लगाउन सकिने व्यवस्था गरिएको छ । यद्यपि बालबालिकाले कुनै उपायबाट नियम छलेर खाता बनाएमा उनीहरूका अभिभावकमाथि कारबाही नहुने बताइएको छ ।

मलेसिया सरकारले बालबालिकालाई हानिकारक सामग्री, साइबर दुर्व्यवहार तथा सामाजिक सञ्जालको लतबाट जोगाउन यो कदम चालिएको जनाएको छ।

मलेसियासँगै अस्ट्रेलिया, ब्राजिल र इन्डोनेसियाले पनि बालबालिकाको सामाजिक सञ्जाल प्रयोगसम्बन्धी कडा नियम लागू गरिसकेका छन् वा त्यस्ता नियम ल्याउने तयारी गरिरहेका छन् ।

यद्यपि केही विज्ञहरूले सरकारी परिचयपत्रमार्फत उमेर प्रमाणीकरण गर्नुपर्ने व्यवस्थाले व्यक्तिगत गोपनीयतासम्बन्धी चिन्ता बढाउन सक्ने बताएका छन्। उता सामाजिक सञ्जाल कम्पनी मेटाले पूर्ण प्रतिबन्ध लगाउँदा बालबालिका निगरानीबाहिर रहेका अन्य मञ्चतर्फ आकर्षित हुन सक्ने चेतावनी दिएको छ।