बुटवल । राष्ट्रको ढुकुटीमा संचित विदेशी मुद्रामा भारी गिरावट आएपछी देशको अर्थतन्त्रमै उथलपुथलको स्थिति सिर्जना भएको छ । जसका कारण पुँजी बाहिरीन नदिन सरकारले १० बस्तुको आयातमा प्रतिबन्ध नै लगाएको छ ।

राष्ट्रिय अर्थतन्त्रको यही कठिन घडिमा देश निर्वाचनमा होमिएको छ । यद्यपि निर्वाचनको क्रममा आर्थिक गतिविधि बढ्न सक्ने र तरलता अभाव घट्ने विश्लेषण अर्थशास्त्रका जानकारहरूले गरेका छन । तर, देशको अर्थतन्त्रलाई राम्रोसँग बुझेका र देशको सबैभन्दा बलियो र प्रत्यक्ष जनतासंग जोडिने स्थानीय सरकारको नेतृत्व गर्न निर्वाचन लड्दै गरेका राजनीतिक दल र स्वतन्त्र तर्फका उम्मेदवारले नै देशको पुँजी बाहिरिने गरि सामाजिक संजालमा पैसा तिरेर 'बूस्ट' गरेका छन् ।

डलर तिरेर सामाजिक संजाल फेसबूक, इन्स्टाग्राम, ह्वाटस्एप मा गरिने प्रचार आफुले चाहेको क्षेत्रका मतदाताको मोबाइल स्क्रीनमा अघि देखिने गर्छ । सोही प्रकृतिको प्रचारका लागि उम्मेदवारहरूले डलर तिरेर देशको ढुकुटी बिदेश पुर्याईरहेका छन् ।

स्थानीय स्रोत र साधनको उपयोग गर्छौ, हामी विकास र समृद्धिको मूल फुटाउँछौं भनेर भाषण गर्ने नेताहरूसंग प्रचारको विकल्पको रुपमा प्रशस्त मिडियाहरू हुँदाहुँदै प्रचारको लागि स्वदेशी पुँजी पलायन हुने विकल्प रोज्नुको पछाडि उनीहरू देशको अर्थतन्त्रबारे चिन्तित नरहेको बुझ्न सकिन्छ ।

यसरी 'बूस्ट' गर्नेहरूमा दलिय उम्मेदवारदेखि दलले गरेनन् अब हामी गर्छौ भनेर स्वतन्त्र उम्मेदवारी दिनेहरू समेत छन् ।

यद्यपि उनीहरूलाई ५०-१०० डलर बिदेशिएर के नै फरक पर्छ र भन्ने लाग्न सक्छ तर एक उम्मेदवारले ५० डलर मात्रै यसरी खर्च गरे पनि कुल ८२ हजार २१० उम्मेदवारमार्फत करोडौं डलर बिदेशीले तर्फ उम्मेदवार सचेत हुन जरुरी छ ।