साउदी अरबमा रुपन्देहीका नेपाली तीर्थालु अलपत्र

खाडी तनावले उडान रोकिँदा मदीनामा रोकिए ३६ तीर्थालु, सरकारसँग उद्धारको आग्रह

सेतोमसी
फाल्गुण २३, २०८२ शनिवार

साउदी अरबमा रुपन्देहीका नेपाली तीर्थालु अलपत्र

साउदी अरबको मदिना शहरमा रोकिएका रुपन्देहीका नेपाली मुस्लिम तीर्थालुहरू । तस्बिर : ताहिर अली / साउदी अरब ।

अ +
अ
अ -

कमल रायमाझी, भैरहवा । हज तथा उमराहका लागि साउदी अरब पुगेका रुपन्देहीका नेपाली मुस्लिम तीर्थालुहरू खाडी क्षेत्रमा बढेको तनावका कारण स्वदेश फर्किन नपाएर अलपत्र परेका छन् । उडान अवरुद्ध भएपछि उनीहरू हाल साउदी अरबको मदिना शहरमा बसिरहेका छन् ।

रुपन्देहीको ओमसतिया गाउँपालिका–४ निवासी ताहिर अलीसहित ३६ जना नेपाली मुस्लिम तीर्थालु १५ दिने प्याकेजमा हज तथा उमराहका लागि साउदी अरब पुगेका थिए । उनीहरू ३ मार्च २०२६ मा हवाईमार्गबाट नेपाल फर्किने तयारीमा रहेका बेला खाडी क्षेत्रमा इरान र अमेरिका बीच बढेको तनावका कारण उडान रोकिएपछि त्यहीँ रोकिएका हुन् ।

तीर्थालुहरूका अनुसार निर्धारित समयमा स्वदेश फर्किन नसक्दा उनीहरू समस्यामा परेका छन् । ताहिर अलीले पठाएको सन्देशमा आफूहरू मदिना शरीफमा बसिरहेको र स्वदेश फर्किने उडानको प्रतीक्षामा रहेको बताएका छन् ।

“नेपालबाट उमराह–हजका लागि आएका हामी ३६ जना तीर्थालु ३ मार्चमा फर्किने तयारीमा थियौँ । तर खाडी क्षेत्रमा युद्ध सुरु भएपछि हाम्रो उडान रोकियो । अहिले हामी मदिना शरीफमा अलपत्र परेका छौँ,” उनले भने ।

उनका अनुसार तीर्थालुहरू त्यहाँस्थित नेपाली दूतावाससँग सम्पर्कमा रहे पनि हालसम्म उद्धारका लागि ठोस पहल नभएको गुनासो गरेका छन् ।

नेपालबाट गएका अन्य दुई समूहका करिब २० जना तीर्थालु पनि सोही क्षेत्रमा रोकिएको उनले जानकारी दिए ।

अलपत्र परेका तीर्थालुहरूले नेपाल सरकारसँग यथाशीघ्र उद्धार गरी सुरक्षित रूपमा स्वदेश फर्किने व्यवस्था मिलाइदिन आग्रह गरेका छन् । युद्धका कारण उडान अवरुद्ध हुँदा बसोबास तथा दैनिक व्यवस्थापनमा कठिनाइ भएको उनीहरूको भनाइ छ ।