भारतको झारखण्डमा एक करोड इनाम राखिएका माओवादी नेता मारिए

सेतोमसी
भाद्र ३०, २०८२ सोमवार

भारतको झारखण्डमा एक करोड इनाम राखिएका माओवादी नेता मारिए

अ +
अ
अ -

काठमाडौँ । भारतको झारखण्डमा एक करोड इनाम राखिएका माओवादी नेता सुरक्षाकर्मीसँगको मुडभेडमा मारिएका छन् ।

भारतीय मिडियाका अनुसार झारखण्डको हजारीबाग जिल्लामा भएको मुठभेडमा माओवादी नेता सहदेव सोरेनलाई मारेको दाबी सुरक्षा बलले गरेको छ । भाकपा माओवादीको केन्द्रीय समितिका सहदेवमाथि सरकारले एक करोडको इनाम थियो ।

पछिल्ला चार दिनमा माओवादी केन्द्रीय समितिका दुई सदस्य मुठभेडमा मारिएका छन् भने अर्का एक सदस्यले आत्मसमर्पण गरेका छन् ।

हजारीबागमा भएको मुठभेडमा सहदेव बाहेक अन्य दुई माओवादी पनि मारिएको मिडिया रिपोर्टमा उल्लेख छ । जसमध्ये एक जनालाई जोनल कमाण्डर चञ्चलको रूपमा पहिचान गरिएको छ । चञ्चलमाथि सरकारले २५ लाख इनाम तोकेको थियो ।

मारिएका माओवादी नेता सहदेव सोरेनसँग माओवादी संगठनको झारखण्ड-बिहार क्षेत्रीय समितिको जिम्मेवारी थियो । केन्द्र सरकारले देशबाट माओवादीहरूलाई पूर्ण रूपमा निर्मूल पार्न ३१ मार्च २०२६ को समयसीमा तोकेको छ । यसका लागि सुरक्षा बलहरूले निरन्तर कारबाही गरिरहेका छन् । ठूलो संख्यामा माओवादीहरू मारिएका छन्, पक्राउ परेका छन् वा आत्मसमर्पण गरेका छन् ।

यसअघि बिहीबार सुरक्षा बलले छत्तीसगढको गरियाबन्दमा भएको एक मुठभेडमा माओवादी केन्द्रीय समिति सदस्य मोडेम बालकृष्णलाई मारेको दाबी गरेको थियो। बालकृष्ण बाहेक यस मुठभेडमा अन्य ९ माओवादी मारिएका थिए । यसपछि, शनिबार नै, अर्की केन्द्रीय समिति सदस्य पोथुला पद्मावती उर्फ सुजाताले तेलंगानामा आत्मसमर्पण गरेकी थिइन् ।