देवदह । स-सानाबालबालिकाहरु अभिभावकसहित फरक-फरक कोठामा झुम्मिएर बसिरहेका छन् । कक्षाकोठाहरु वातानुकुलित छन्, तर बाहिर उभिन नसकिने टण्टलापुर घाम छ । सिजनल रुपमा विभिन्न अवसरवादी रोगहरु र दिर्घरोग परिक्षणका लागि रोज बर्ड मन्टेश्वरी देवदह–६ मा शुक्रवार देखिएको दृश्य हो यो । जहाँ स्वास्थ्त्यकर्मीहरुले सो स्कूलमा अध्ययनरत बालबालिका र तिनका अभिभावकको स्वास्थ्य परिक्षण गरिरहेका थिए । 

देवदह मेडिकल कलेज भलुहीको प्राबिधिक टोलीले रोजवर्डमा स्वास्थ्य परिक्षण गरिरहेको थियो । जहाँ नाक, कान, घाँटी, दाँत र आँखाको चेकजाँच हुँदैथियो । संख्यामा ६० जना विद्यार्थी रहेको रोजवर्डले यसपटकको शुक्रवारलाई स्वास्थ्य परिक्षण वारको रुपमा लिएर आफ्ना विद्यार्थी र अभिभावकको स्वास्थ्य परिक्षण गराईरहेको हो । 

स्वास्थ्यलाई संवेदनशिल रुपमा लिँदै रोजवर्डले विगतमा समेत स्वास्थ्य परिक्षणका कार्यक्रम गर्दै आएको थियो । ‘विगतमा  बर्षको ३ पटक विद्यार्थीहरुको स्वास्थ्य परिक्षण गरिन्थ्यो । यो पटक उनीहरुका अभिभावकलाई पनि संगै बोलाएर संगसंगै स्वास्थ्य जाँच गरिएको छ ।’ विद्यालयका प्रवन्ध निर्देशक प्रकाश अधिकारीले भने, ‘यसले हामीलाई थप हौसला प्रदान गरेको छ । विद्यार्थीका अभिभावकलाई संगै राखेर स्वास्थ्य परिक्षण गरेपछि उनीहरुका समस्या अभिभावकलाई पनि थाह हुने भो ।’ 

स्वास्थ्य परिक्षणका लागि मेडिकल कलेजका वरिष्ठ नेत्र अधिकृत डा. हिरालाल धामी, र बालरोग डा.माधब भुसाल लगायत ४ जनाको स्वास्थ्यकर्मीहरुको टिम खटिएको थियो । सोहि क्रममा विरामी जाँचीरहेका डा. धामीले देवदह क्षेत्रमा गरिने विभिन्न शिविरहरुमा २० प्रतिशतसम्म दृष्टिदोषको समस्या देखिने गरेको जानकारी दिए । उनले खानपिन, मोबाइल, टिभी तथा ईलेक्ट्रोनिक डिभाईसहरु प्रति बालबालिकाको बढ्दो मोह आदि जस्ता कारणले बालबालिकामा यस्तो समस्या देखिने गरेको बताए ।

‘फिजिकल एक्सरसाइज नहुनु, सजिलोको लागि बसेर गरिने कामहरु बढ्नाले अन्य उमेर समूहमा पनि यसले असर पारिरहेको छ ।’ धामीले भने, ‘यसबारे सबै अभिभावक समयमै सचेत भई आफ्ना बालबालिकालाई समेत यस्ता समस्याहरुबाट जोगाउनुपर्दछ ।‘ उनले स्वास्थ्य प्रति घर परिवारबाटै सचेत र जिम्मेवार बन्ने हो भने स्वास्थ्यको क्षेत्रमा हुने खर्च जोगिने र स्वस्थ्य समाज निर्माण हुने समेत बताए । 

स्वास्थ्य परिक्षणबारे थाहा पाएर विद्यार्थीसंगै अएका अभिभावक मुक्तिराम पोखरेलले मन्टेश्वरीले विद्यार्थीसंगै अभिभावकको समेत स्वास्थ्य परिक्षण गरेकोमा खुशी व्यक्त गरे । उनले भने, ‘विरामी हुँदा बाहेक सामान्य चेकजाँचको लागि अस्पताल जाने हाम्रो बानी हुँदैन, त्यसैले पनि विद्यालयले गरेको यो काम सराहनीय छ ।’

कार्यक्रममा विद्यार्थी तथा अभिभावकको उत्साहजनक उपस्थिती रहेको र सो क्रममा एक सय ३३ जनाको स्वास्थ्य परिक्षण गरिएको मन्टेश्वरीका प्रिन्सिपल विपना रिजालले जानकारी दिईन् ।