देवदह । देवदह नगरपालिकाका प्रमुख ध्रुव प्रसाद खरेलले जलवायु संरक्षणको लागि सबैले सहकार्य गर्नुपर्ने बताएका छन् । जलवायु परिवर्तनले मानवीय क्षेत्रमा प्रतिकुल असर पार्ने हुँदा त्यस प्रति सचेत र सजग हुँदै यसको संरक्षणमा लाग्नुपर्ने उनले बताए ।

निर्माण बहुउद्धेश्यीय सहकारी संस्था देवदहले आयोजना गरेको जलवायु अनुकुलतामा सहभागिता सम्वन्धी सचेतना कार्यक्रममा बोल्दै खरेलले जलवायु परिवर्तनले विश्वलाई असर गरेको भन्दै जलवायु सम्वन्धी सचेतना जगाउन आवश्यक रहेकोमा जोड दिए । ‘जलवायु प्रदूषण रोक्नको लागि घरबाट निस्कने फोहोरलाई बर्गिकरण गर्न आवश्यक छ । त्यसको लागि नागरिकले फोहोर बर्गीकरण गरेर सहयोग गर्नुपर्छ ।’ नगरप्रमुख खरेलले भने, ‘जलवायु प्रदूषण रोक्नको लागि गरी मुख्यगरी सामुदायिक वनहरुको भुमिका महत्वपूर्ण हुन्छ ।’ 

कार्यक्रममा बोल्दै देवदह नगरपालिका वडा नं ९ का अध्यक्ष मोहन बहादुर जिसीले वन डढेलोका कारण कार्वन डाइअक्साईड उत्पादन हुने र त्यसले जलवायुमा असर पुर्याउने भएकाले यसप्रति सचेत हुन आवश्यक रहेको बताए । दिनप्रतिदिन पृथ्वीको तापक्रम बढ्दै गएको उल्लेख गर्दै उनले वन तथा प्राकृतिक सम्पदाको संरक्षणमा ध्यान नदिए मानव जातिले प्राकृतिक विपत्तिको सामना गर्नुपर्ने उल्लेख गरे । 

राष्ट्रिय सहकारी महासंघका संचालक टिका गौतमले जलवायु संरक्षणको लागि वन जंगलमा वृक्षरोपण गर्न आवश्यक रहेको बताउँदै सहकारी र सामाजिक संघसंस्थाहरुले समेत त्यसमा सहयोग र सहकार्य गर्नुपर्ने बताईन् । उनले हरेक घरमा करेसावारी र फलफुलका विरुवा अनिवार्य लगाउनुपर्ने भन्दै सहकारीहरुले यसलाई अभियानका रुपमा सञ्चालन गरिरहेको जानकारी दिइन् । 

कार्यक्रममा जिल्ला सहकारी संघ रुपन्देहीका सदस्य प्रमोद खनाल, सहकारी सञ्जाल देवदहका सचिव गोविन्द ठडराई, सन्दिप आधारभूत विद्यालयका प्रधानाध्यापक दुर्गालाल तिवारी, प्रगति सामुदायिक वनका अध्यक्ष दुर्गबहादुर राना लगायतले मन्तब्य राखेका थिए । सहकारी संस्थाद्धारा प्रकाशित २०८२ सालको भित्तेपात्रो समेत विमोचन गरिएको कार्यक्रममा सहकारी अभियन्ता सन्दिप सापकोटाले जलवायुका विषयमा कार्यपत्र प्रस्तुत गरेका थिए । 

संस्थाका अध्यक्ष मोतीलाल ढकालको अध्यक्षता र व्यवस्थापक सुशिला भण्डारीको सञ्चालनमा भएको कार्यक्रममा सहकारीका पदाधिकारी, सदस्य, सामुदायिक वनका पदाधिकारी तथा विभिन्न संघसंस्थाका प्रतिनिधिहरुको सहभागिता रहेको थियो ।