बुटवलमा मगर भाषा तालिम

सेतोमसी
माघ ३, २०८१ बिहिवार

अ +
अ
अ -

बुटवल । नेपाल मगर संघ बुटवल उपमहानगर वडा नं ७ समितिले आयोजना गरेको मगर भाषा ढुट प्रशिक्षण तालिम समापन भएको छ ।

१५ दिनसम्म सञ्चालन गरिएको तालिम बुधबार समापन गरिएको नेपाल मगर संघ बुटवल उपमहानगर वडा नं ७ इकाइ समितिका अध्यक्ष सूर्य बहादुर गाहा मगरले जानकारी दिए ।

तालिम समापन कार्यक्रममा बोल्दै बुटवल उपमहानगर वडा नं ७ का वडा अध्यक्ष पदमराज गाहामगरले मगर भाषा लगायत जुनसुकै भाषा संरक्षणका लागि उक्त भाषा मानवीय जीवनसंग जोडिएको हुनुपर्ने बताए । दैनिक जीवनमा भाषालाई प्रयोगमा ल्याउन आवश्यक रहेको उहाँको भनाई थियो ।

सो अवसरमा नेपाल मगर बौद्ध सेवा समितिका प्रशिक्षण विभाग प्रमूख पूूर्ण बहादुर तरामीमगर, नेपाल मगर संघ बुटवल उपमहानगर समितिका अध्यक्ष बसन्ती साठिघरे मगर, पत्रकार सनु थापामगर लगायतले बोलेका थिए । ७१ जना प्रशिक्षार्थीहरु सहभागी रहेको कार्यक्रममा प्रशिक्षणमा उत्कृष्ट हुने विद्यार्थीहरुलाई सम्मान समेत गरिएको थियो । संघका वरिष्ठ उपाध्यक्ष लक्ष्मी पुनमगरको स्वागत तथा सचिव अनन्त बहादुर गाहामगरको सञ्चालनमा कार्यक्रम सम्पन्न भएको हो ।

यस्तै नेपाल मगर संघ बुटवल उपमहानगर समितिले माघे सक्रान्ति पर्वको अवसरमा बुटवलमा बुधबार शुभकामना आदानप्रदान कार्यक्रम गरेको छ । सो अवसरमा बोल्ने वक्ताहरुले हरेक समुदायको स्थानीय चाड र पर्वलाई राष्ट्रियकरण गर्न आवश्यक रहेको बताए ।