वैज्ञानिक समाजवादी कम्युनिष्ट पार्टीको महासचिवमा आहुति

सेतोमसी
पौष २५, २०८१ बिहिवार

वैज्ञानिक समाजवादी कम्युनिष्ट पार्टीको महासचिवमा आहुति

अ +
अ
अ -

काठमाडौं । वैज्ञानिक समाजवादी कम्युनिस्ट पार्टीको महासचिवमा विश्वभक्त दुलाल (आहुति) चयन भएका छन् । पार्टीको पहिलो राष्ट्रिय सम्मेलनले आहुति नेतृत्वमा ५१ सदस्यीय केन्द्रीय समिति बनाएको छ । पार्टीको राष्ट्रिय सम्मेलन पुस १९ देखि २१ सम्म काठमाडौंमा भएको थियो ।

बिहीवार सम्मेलनका निर्णय सार्वजनिक गर्दै महासचिव आहुतिले छरिएर रहेका क्रान्तिकारी कम्युनिष्टहरू एक हुनका लागि पहल गर्ने निर्णय भएको जानकारी गराएका छन् ।

त्यस्तै, क्रान्तिकारी शक्तिहरूका बीचमा संयुक्त मोर्चा निर्माण गर्दै राष्ट्रियता, जनतन्त्र र जनजीविकाको सवालमा नयाँ उचाईमा संघर्षको उठान गर्ने निर्णय पनि भएको जानकारी गराइएको छ ।

सम्मेलनपछि बसेको पार्टीको केन्द्रीय समिति बैठकले तीन महिने कार्ययोजना निर्माण गर्ने निर्णय गरेको जारी प्रेस विज्ञप्तिमा बताइएको छ ।

जसअन्तर्गत माघ २० गतेसम्म सबै ब्यूरोस्तरीय प्रशिक्षण सम्पन्न गर्ने, फागुन र चैत्र महिनामा २ महिने विशेष राजनीतिक अभियान सञ्चालन गर्ने निर्णय गरेको जानकारी गराइएको छ ।

‘अभियानको क्रममा सबै तहका सरकारहरूको हिसाब खोज्ने, भ्रष्टहरूलाई कारबाही गर्ने, जनताका समस्याहरु समाधान गर्न पहल लिने निर्णय गरेको छ । अभियानको उत्कर्षको रुपमा चैत्र २४ गते देशव्यापी प्रदर्शन गर्ने तथा चैत्र अन्तिम साता केन्द्रीय पार्टी स्कुल सञ्चालन गर्ने निर्णय गरिएको छ,’ केन्द्रीय समिति बैठकको निर्णयमा भनिएको छ ।