बालिका बलात्कार आरोपमा पक्राउ परेका बिर्तामोडका पूर्व नगरप्रमुख शिवाकोटी कारागार चलान

सेतोमसी
पौष २२, २०८१ सोमवार

बालिका बलात्कार आरोपमा पक्राउ परेका बिर्तामोडका पूर्व नगरप्रमुख शिवाकोटी कारागार चलान

अ +
अ
अ -

काठमाडौं । घरेलु कामदारको रुपमा राखिएकी १६ वर्षीया नाबालिकालाई जबरजस्ती करणी गरेको आरोपमा पक्राउ परेका बिर्तामोड नगरपालिकाका पूर्व नगरप्रमुख ध्रुवकुमार शिवाकोटी कारागार चलान भएका छन् ।

झापा जिल्ला अदालतले सोमबार उनलाई पुर्पक्षका लागि कारागार चलान गर्ने आदेश दिएको हो ।

सोमबार भएको थुनछेक बहसपछि न्यायाधीश नवीनकुमार जोशीको इजलासले शिवाकोटीलाई थुनामा राखेर अनुसन्धान गर्न आदेश दिएको अदालतका स्रेस्तेदार किरणकुमार सिंहले जानकारी दिए ।

शिवाकोटीको स्वास्थ्य अबस्थालाई ख्याल गरी स्वास्थ्य उपचारको व्यवस्था गर्न न्यायाधीशको आदेशअनुसार झापा कारागार प्रशासनलाई पत्र पठाइएको सिंहले बताए ।

आइतबार शिवाकोटीसँग बयान लिइएको थियो । शिवाकोटीको पक्षमा अशोक पोखरेल, गजेन्द्र आचार्य, टंक उप्रेती, बालकुमार कट्वाल लगायतका कानुन व्यवसायीहरूले बहस गरेका हुन ।

घरेलु कामदारको रूपमा राखिएकी नाबालिकालाई करणी गरेको आरोपमा प्रहरीले उनलाई पक्राउ परेकै दिनदेखि बीएण्डसी अस्पतालमा राखेको थियो।

प्रहरीले उनलाई गत मंसिर २४ गते पक्राउ गरेको थियो ।