बुटवलको बाजेबजै स्थानमा पितृ पूजा

सेतोमसी
मंसिर ३०, २०८१ आइतवार

अ +
अ
अ -

बुटवल । विभिन्न ठाउँबाट बुटवलमा आएर बसेका मगर समुदायले बुटवल ७ दीपनगर स्थित बाजेबजै स्थानमा आफ्ना पितृहरुको पूजा गरेका छन् । नेपाल मगर संघ बुटवल उपमहानगर समितिको अगुवाइमा हरेक वर्ष झै यसपटक पनि स्थान परिसरमा आइतबार विशेष पूजा सम्पन्न गरेका हुन् ।

सो अवसरमा आयोजित विशेष समारोहलाई सम्बोधन गर्दै बुटवल उपमहानगरपालिकाका प्रमूख खेलराज पाण्डेयले मगर समुदाय सांस्कृतिक र भाषिक रुपमा समृद्ध समुदाय रहेको बताउँदै यसलाई संरक्षण र प्रवद्र्धनका लागि आवश्यक रहेकोमा जोड दिए । मगर समुदायको भाषा संरक्षणको लागि बुटवल उपमहानगरले मगर ढुट भाषामा नागरिक वडापत्र राखेर सुरुवात गरेको उनले बताए ।

बुटवलमा बसोबास रहेका हरेक समुदायको भाषा र सस्ंकार, संस्कृतिलाई बचाउन नगरपालिकाले कन्जुस्याई नगर्ने उनको भनाई छ ।

नेपाल मगर संघ बुटवल उपमहानगर समितिका अध्यक्ष बसन्ती साठिघरे मगरको अध्यक्षतामा सम्पन्न कार्यक्रममा मगर संघका केन्द्रीय उपमहासचिव कमला थापामगर, मगर संघ जिल्ला समिति रुपन्देहीका अध्यक्ष प्रेम थापामगर लगायतले बोलेका थिए । कार्यक्रम संघका बुटवल नगर उपाध्यक्ष लुम बहादुर सारुको स्वागत तथा सचिव हेमन्त बुढाथोकीको सञ्चालनमा सम्पन्न भएको थियो ।

मगर समुदायले हरेक वर्ष मंसिर अन्तिम शुक्ल पूर्णिमाको दिन मगरहरुले आफ्ना पितृहरुको स्मरण गर्दै बाजेबजैलाई पूजाआजा गर्ने प्रचलन रहेको छ ।