देवदह । रुपन्देहीको देवदह-१२, ढोलबजवामा अवस्थित सिक्टहन माध्यमिक विद्यालयमा ४० वर्षदेखि अध्यापनरत शिक्षकलाई विदाई गरिएको छ । लामो समय विद्यालयको प्रधानाध्यापकसमेत रहेर काम गरेका शिक्षक दुधनाथ कुँवरले अवकाश लिएपछि बुधबार एक कार्यक्रमबीच उनलाई विदाई गरिएको हो ।

२०४१ साल मङ्सिर १ गते अस्थायी शिक्षकको रुपमा सिक्टहन मावि प्रवेश गरेका शिक्षक कुँवरले २०४५ साल माघ २७ गते स्थायी भएर निरन्तर ४० वर्षसम्म  अध्यापन गरे । 

विदाई कार्यक्रममा भावुक हुँदै शिक्षक कुँवरले आफुलाई विद्यालय र विद्यार्थीको मायाले बाधिरहने बताए । विद्यालयबाट आफुले कागजी रुपमा मात्र अवकाश प्राप्त गरेको उल्लेख गर्दै उनले आफु हरेकपल विद्यालयको काममा खट्ने प्रतिबद्धता जनाए । 

विद्यालयबाट विदाई हुँदै गर्दा शिक्षक कुँवरले आफ्नो बुबा र आमाको नाममा रु १ लाख १० हजार बराबरको अक्षयकोष राख्ने घोषणा गरे । 

कार्यक्रमका देवदह नगरपालिका वडा नं १२ का अध्यक्ष डेग बहादुर सारुले सिक्टन माविमा वडा कार्यालयले पहिलेदेखि सहयोग गर्दै आएको बताए ।  विद्यालयले शिक्षक दुधनाथ कुंवरको योगदान सबै सम्झिने बताउंदै वडा अध्यक्ष सारुले उनी विद्यालयको मेरुदण्डका भएकोले विद्यालयलाई निरन्तर सुझाब सल्लाह प्रदान गर्न आग्रह गरे । 

कार्यक्रममा रोहिणी -७, टिकहरस्थित सरस्वती आधारभुत विद्यालयका प्रधान्याध्यापक समेत रहेका शिक्षक कुँवरका भाई धनेश्वर कुवंरले विद्यालयमा  लागि १ लाख राशीको अक्षयकोष स्थापना गर्ने घोषणा गरे । 

सो अवसरमा विद्यालयका शिक्षक समसुलहक खांले समेत १० हजार अक्षयकोष थप गर्ने प्रतिबद्धता जनाए । 

विदाई समारोहमा विद्यालयका प्रधानाध्यापक  दिनेश त्रीपाठी, सहायक प्रधानाध्यापक फुलप्रसाद पाण्डे, शिक्षकहरु रिता पराजुली, समसुलहक खां, सन्जय कुमार चौधरी, राम हर्क भहर,पशुपति यादव लगायतले शुभकामना बोलेका थिए । 

विद्यालयका अध्यक्ष हेमराज कुँवरको अध्यक्षता रहेको विदाई कार्यक्रममा २८ जना शिक्षक र ४०० बढी विद्यार्थीहरुको सहभागीता रहेको थियो ।