काठमाडौं । सूर्यदर्शन सहकारीको ठगी प्रकरणमा प्रहरीले नेचर हर्ब्स इन्टरनेशनलका सञ्चालक रामबहादुर खनाललाई पक्राउ गरेको छ ।
केन्द्रीय अनुसन्धान ब्यूरो (सीआईबी) को टोलीले तनहुँको भानु नगरपालिका–८ बगालेफाँटका ४८ वर्षीय खनाललाई पक्राउ गरेको हो । उनी रवि लामिछाने र छविलाल जोशीसँगै गोर्खा ग्रुप अफ कम्पनी लिमिटेडका पनि शेयरधनी हुन् ।
सीआईबीका प्रवक्ता एवम् एसपी होविन्द्र बोगटीका अनुसार खनाललाई काठमाडौंको पानीपोखरीबाट पक्राउ गरिएको हो । उनीमाथि थप अनुसन्धानका लागि जिल्ला प्रहरी कार्यालय, कास्की पठाइएको बोगटीले बताएका छन् ।
सहकारीको रकम नेचर हर्ब्समा पनि ल्याएको पाइएपछि उनलाई पक्राउ गरिएको प्रहरीले जनाएको छ । दुवै संस्थाका मुख्य सञ्चालक जीबी राई हुन् । सूर्यदर्शन सहकारी ठगी प्रकरणमा अहिले पूर्वगृहमन्त्री रवि लामिछाने कास्की प्रहरीको हिरासतमा छन् ।
सूर्यदर्शन सहकारीमा ठगिएकामध्ये कृष्णप्रसाद जैसीसमेतको जाहेरीमा पूर्वगृहमन्त्री एवम् रास्वपा सभापति लामिछानेलाई पक्राउ गरिएको थियो।
उनीमाथि दोस्रो पटक म्याद थपेर अनुसन्धान जारी छ । जीबी राईका अर्का साझेदार पूर्वडीआईजी छविलाल बन्जाडे जोशी पनि अनुसन्धानका क्रममा एक महिनादेखि कास्कीमै हिरासतमा छन् ।
.gif)