एमाले गण्डकीको इञ्चार्जमा किरण गुरुङ

सेतोमसी
श्रावण १७, २०८१ बिहिवार

अ +
अ
अ -

राजेश पराजुली, पोखरा । नेकपा एमाले गण्डकीको इञ्चार्जको जिम्मेवारी नेता किरण गुरुङले पाएका छन् । आज बसेको पार्टीको सचिवालय बैठकले किरणलाई गण्डकीको इञ्चार्ज बनाएको हो ।

गण्डकीमा यसअघि पार्टी सचिव गोकर्ण बिष्ट इञ्चार्ज थिए । सचिव बिष्ट दोहोरो जिम्मेवारीमा पर्ने भएकाले प्रदेश इञ्चार्जबाट हटाइएको हो । तनहुँ निवासी गुरुङ गण्डकी प्रदेश सरकारका पूर्व अर्थमन्त्रीसमेत हुन् ।

बैठकले सचिवद्वय पद्मा अर्याल र लेखराज भट्टबाहेक अरु प्रदेश इञ्चार्ज फेर्ने निर्णय गरेको हो । पार्टी सचिव अर्याल लुम्बिनी र भट्ट सुदूरपश्चिम प्रदेश इञ्चार्ज रहेका छन् । बाँकी प्रदेशमा इञ्चार्ज फेरिएका हुन् ।

जसअनुसार कोशीकोमा पूर्व मुख्यमन्त्री शेरधन राई, मधेसमा लीलानाथ श्रेष्ठ, बागमतीमा राजन भट्टराई र कर्णालीमा गोरखबहादुर बोगटी प्रदेश इन्चार्ज बनेका छन् ।

यसअघि कोशीमा रघुवीर महासेठ, मधेसमा योगेश भट्टराई, बागमतीमा गुरुप्रसाद बराल र गण्डकीमा गोकर्ण विष्ट इन्चार्ज थिए । बराललाई बढुवा गरेर उपाध्यक्ष मनोनित गरिएको बताइएको छ ।