आज विश्व बाघ दिवस मनाइँदै

सेतोमसी
श्रावण १४, २०८१ सोमवार

अ +
अ
अ -

राजेश पराजुली, पोखरा । आज विश्व बाघ दिवस । सन २०१० देखि नेपाले पनि अन्तर्राष्ट्रिय स्तरमा बाघ दिवस मनाउँदै आएको छ । ‘अब चाहीँ बाघ संरक्षणका लागि कदम चाल्ने समय आयो’ भन्ने नाराका साथ आज विश्व बाघ दिवस मनाइँदै छ । करिब सय वर्ष अघि विश्वमा बाघको सङ्ख्या एक लाखको हाराहारीमा थियो ।

एक दशक अघिसम्म बाघको सङ्ख्या तीन हजार दुई सयमा सीमित भएपछि विश्वमा यसको सङ्ख्या दोब्बर बनाउने लक्ष्यसहित सन् २०१० नोभेम्बरमा रुसको सेन्ट पिटर्सबर्गमा भएको भेलाले निर्णय गरेको थियो ।

सोहीअनुसार नेपालले बाघको सङ्ख्या दोब्बर बनाउन सफल भएको छ । नेपालमा बाघको सङ्ख्या तीन सय ५५ पुगेसँगै नेपालले सन् २०२२ सम्ममा सङ्ख्या दोब्बर बनाउन गरेको सङ्कल्प पनि पूरा गरेको हो । सबैभन्दा धेरै बाघ चितवनमा राष्ट्रिय निकुञ्जमा पाइएका छन् । त्यहाँ एक सय २८ वटा बाघ छन् ।

यसैगरी बर्दिया राष्ट्रिय निकुञ्जमा एक सय २५ बाघ पाइएका छन् । बाँकेमा २५, पर्सामा ४१, शुक्लाफाँटामा ३६ वटा बाघ छन् । । गत वर्ष मङ्सिर १९ गते सुरु भएर फागुन २८ गते बाघ गणना सम्पन्न भएको थियो । राष्ट्रिय निकुञ्ज तथा वन्यजन्तु संरक्षण ऐन २०२९ मा बाघलाई संरक्षित वन्यजन्तुको सूचीमा राखिएको छ ।

पछिल्ला वर्षमा नेपालमा बाघको सङ्ख्या उल्लेख्य रूपमा बढेको छ तर बाघ संरक्षणको चुनौती पनि कम छैन । बाघको प्रभावकारी व्यवस्थापन गर्न नसके मानव–बाघ द्वन्द्व बढ्ने अर्को जोखिम पनि उत्तिकै छ ।