हाइटीमा शक्तिशाली भूकम्प जांदा ३ सय ४ जनाको मृत्यु १८ सय बढि घाइते, प्रधानमन्त्रीद्वारा एक महिने आपतकाल घोषणा

अशोक गौतम 'क्षितिज'
श्रावण ३१, २०७८ आइतवार

हाइटीमा शक्तिशाली भूकम्प जांदा ३ सय ४ जनाको मृत्यु १८ सय बढि घाइते, प्रधानमन्त्रीद्वारा एक महिने आपतकाल घोषणा

अ +
अ
अ -

एजेन्सी । क्यारबियन देश हाइटीमा ७.२ म्याग्निच्युटको शक्तिशाली भूकम्प जाँदा ३०४ जनाको मृत्यु भएको छ भने १८ सय भन्दा बढी घाइते भएका छन । अधिकांश भवनहरु क्षतिग्रस्त भएकाले घाइते तथा मृतकको संख्या अझै बढ्न सक्ने अधिकारीहरुले जनाएका छन् ।

प्रधानमन्त्री एरियल हेनरीले भूकम्पबाट व्यापक क्षति पुगेको भन्दै एक महिने आपतकाल घोषणा गरेका छन् । भूकम्पबाट मानिसहरुका घर, चर्च, होटेल लगायतका संरचनाहरु भत्किएका छन् ।

स्थानीय समय अनुसार शनिबार बिहान सेन्ट लुइस डू सुड शहर भन्दा १२ किलोमिटर पर केन्द्रविन्दु भएर भूकम्प गएको अमेरिकी जिओलोजिकल सर्वे (युएसजिएस) ले जनाएको छ । भूकम्पको धक्का करिब १२५ किलोमिटर टाढा रहेको राजधानी पोर्ट ओ प्रिन्समा र छिमेकी देशहरुमा पनि महसुस गरिएको थियो ।

सन् २०१० मा ७ म्याग्निच्युटको विनाशकारी भुकम्पले दुइ लाख बढिको ज्यान लिएको थियो । त्यस भूकम्पबाट तंगि्रदै गैरहेको हाइटी फेरि अर्को भूकम्पको मारमा परेको बीबीसीले जनाएको छ ।

प्रधानमन्त्री एरियल हेनरीले हाइटीमा सहयोगका लागि अन्तर्राष्ट्रिय समुदायसँग पनि अपील गरेका छन । यस्तै अमेरिकी राष्ट्रपति जो बाइडनले भूकम्पबाट प्रभावित हाइटीमा तत्काल राहत सहयोग गर्न यूएसआइडीलाई भनेका छन् ।
शक्तिशाली भुकम्प पछि अहिले पनि त्यसको परकम्पहरु आउने क्रम जारी रहेको छ । सबैलाई सतर्क रहन भनिएको छ ।