लुम्बिनीमा नयाँ सरकार गठनका लागि विपक्षी ४१ सांसदले प्रदेश प्रमुख समक्ष बुझाए हस्ताक्षर

सेतोमसी
श्रावण १८, २०७८ सोमवार

लुम्बिनीमा नयाँ सरकार गठनका लागि विपक्षी ४१ सांसदले प्रदेश प्रमुख समक्ष बुझाए हस्ताक्षर

अ +
अ
अ -

बुटवल । लुम्बिनी प्रदेशमा कांग्रेससहितका विपक्षी गठवन्धन दलका सांसदहरुले नयाँ सरकार गठन गर्न प्रदेश प्रमुखसँग आग्रह गरेका छन् ।

नेपाली कांग्रेस, नेकपा माओवादी केन्द्र, जसपा र राष्ट्रिय जनमोर्चाका ४१ सांसदको हस्ताक्षर जुटाई प्रदेश प्रमुख अमिक शेरचनलाई नयाँ सरकार गठनको आह्वान गर्न निवेदन दिएका हुन् । बिपक्षी गठबन्धनले ४१ सांसद संख्या सरकार गठनको लागि बहुमत हुने भन्दै सरकार गठनको लागि दाबी गरेका हुन ।

मुख्यमन्त्री शंकर पोखरेल यस अघि नै अल्पमतमा परेको र जालझेल गरेर सत्तामा बसिरहेको उनिहरुले बताउदै आएका छन । उनिहरुले संविधानको धारा १६८ को उपधारा (२) अनुसार सरकार गठन आह्वानको लागि हस्ताक्षर सहित निवेदन दिएका हुन ।

हस्ताक्षर बुझाउनका लागि कांग्रेस संसदीय दलका नेता वीरेन्द्रकुमार कनौडिया, नेकपा (माओवादी केन्द्र)का संसदीय दलका नेता कुलप्रसाद केसी, जसपा संसदीय दलका नेता सहसराम यादव र राष्ट्रिय जनमोर्चाकी संसदीय दलकी नेता तारा जिसी पुगेका थिए।

लुम्बिनी प्रदेश सभामा ८३ जना सांसद रहेका छन् । जसमध्ये माओवादी केन्द्रका २०, कांग्रेसका १९ र जसपाका ६ जना, एमालेबाट ४१ जना सांसद र राष्ट्रिय जनमोर्चाका एक जना सांसद रहेका छन् । मुख्यमन्त्री शंकर पोखरेललाई सरकार बचाउन कूल ४४ सांसद आवश्यक पर्नेमा अहिले ४१ जनाको समर्थन छ ।