आलिया भट्टकी पूर्व निजी सहायक ठगीको आरोपमा पक्राउ

एजेन्सी
आषाढ २५, २०८२ बुधवार

आलिया भट्टकी पूर्व निजी सहायक ठगीको आरोपमा पक्राउ

अ +
अ
अ -

काठमाडौँ । बलिउड अभिनेत्री आलिया भट्टकी पूर्व निजी सहायक वेदिका प्रकाश शेट्टी पक्राउ परेकी छन् । उनलाई आलियाको प्रोडक्सन हाउस र व्यक्तिगत खाताबाट ७७ लाख ठगी गरेको आरोप लागेको भारतीय मिडियाहरुले उल्लेख गरेका छन् ।

वेदिका शेट्टीलाई आलिया भट्टको प्रोडक्सन हाउस 'इटरनल सनशाइन प्रोडक्सन प्राइभेट लिमिटेड' र आलियाको व्यक्तिगत खाताबाट पैसा निकालेको आरोपमा पक्राउ गरिएको बताइएको छ । मिडिया रिपोर्टका अनुसार शेट्टीले यी दुवै खाताबाट अवैध रूपमा ७७ लाख रुपैयाँभन्दा बढी रकम निकालेको बताइएको छ । यद्यपि, यस मुद्दामा अनुसन्धान भइरहेको र अधिकारीहरूले थप खुलासा हुन सक्ने बताएका छन् ।

प्रहरीले केही महिना अघि आलियाकी आमा सोनी राजदानको उजुरीमा यो मुद्दा दर्ता गरेको र लगभग ५ महिनापछि, आरोपीलाई बेंगलुरुबाट पक्राउ गरी अदालतमा पेश गरिएको थियो । वेदिकामाथि आलियाको हस्ताक्षर नक्कली गरेर दुई वर्षमा ७७ लाख ठगी गरेको आरोप छ ।

'इटरनल सनशाइन प्रोडक्सन' २०२१ मा आलिया भट्टले स्थापना गरेकी थिइन्। आलियाको यस प्रोडक्सन हाउसको पहिलो फिल्म 'डार्लिङ्स' थियो, जुन शाहरुख खानको कम्पनी रेड चिलीज इन्टरटेनमेन्टसँग मिलेर निर्माण गरिएको थियो । यस फिल्ममा आलिया भट्ट, विजय वर्मा र शेफाली शाहले महत्त्वपूर्ण भूमिका खेलेका छन् । फिल्म नेटफ्लिक्समा स्ट्रिम गरिएको थियो र दर्शकहरूबाट राम्रो प्रतिक्रिया पाएको थियो ।