बुटवल । राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले वर्तमान राजनीतिक व्यवस्थाले देशलाई असफलतातर्फ धकेलेको आरोप लगाएका छन् । सनिवार बुटवलमा आयोजित बृहत आमसभालाई सम्बोधन गर्दै अध्यक्ष लिङ्देनले भ्रष्टाचार संस्थागत भएको, राजनीतिक दलहरू स्वार्थमा लिप्त भएको तथा जनताको अवस्था झनै दयनीय बन्दै गएको बताए ।

‘देशमा भ्रष्टाचार विगत देखि नै थियो, तर अहिले त्यो बढेर संस्थागत जस्तै भएको छ ।’ उनले भने, ‘विदेशिएका युवाको अवस्था दर्दनाक छ, सरकारले युवाहरूलाई स्वदेशमै रोजगारी सिर्जना गर्न सकिरहेको छैन ।’ 

अध्यक्ष लिङ्देनले अझैपनि पर्खेर बस्नु भनेको देश बर्बादीतर्फ जानु भएको तर्क गरे । उनले वैदेशिक रोजगारीमा जाने नेपालीहरूको मृत शरीर स्वदेश फर्कदा राजनीतिक दलहरूले जस लिने प्रवृत्तिको आलोचना समेत गरे । अध्यक्ष लिङ्देनले सत्तामा रहेका दलहरुले मुलुकलाई अध्यादेशको भरमा चलाउन खोजेको र जनताको असन्तोषलाई वेवास्ता गरेको आरोप लगाए ।

नेपालका लागि वर्तमान राज्य व्यवस्था असफल भईसकेको भन्दै उनले संघीय व्यवस्था खारेज गर्नुपर्ने, संसदलाई पूर्ण समानुपातिक बनाउने, तथा निर्वाचित प्रधानमन्त्रीलाई दुई कार्यकालसम्म सीमित गर्ने जस्ता प्रस्ताव अघि सारे ।

अध्यक्ष लिङ्देनले नेपालमा राजसंस्थाको पुनःस्थापना हुनुपर्ने तर कार्यकारी अधिकार निर्वाचित प्रधानमन्त्रीलाई दिनुपर्ने धारणा राखे । ‘राजा रहनुपर्छ, तर प्रधानमन्त्री जनताबाट निर्वाचित हुनुपर्छ । उनले भने, ‘जसलाई दुई कार्यकालभन्दा बढी रहन नपाइने व्यवस्था ल्याउनुपर्छ ।’

नेपालको परराष्ट्र नीतिबारे बोल्दै अध्यक्ष लिङ्देनले कुनै पनि देशको प्रभावमा नपरी स्वतन्त्र नीति अवलम्बन गर्नुपर्नेमा जोड दिए ।