अनुमान

अनुमान – रामचन्द्र तिम्सिना
(आवाज)

आज पानी पर्नसक्छ – मौषम बिभाग
राजनीतिक फेरबदल हुनसक्छ – पत्रकार
स्वास्थ्यमा खराबी आउन सक्छ – ज्योतिष
देशमा राजनीति संकट निम्तिन सक्छ – विद्वान

यहाँ हरेकले आफ्नो
मनमा लागेका कुराहरुको
आशावादी अनुमान गर्ने गर्छन्
जस्तो कि –
नयाँ सरकार बन्दैछ तलब बढ्न सक्छ – कर्मचारी
सरकार फेरिदैछ भत्ता बढ्न सक्छ – वृद्धवृद्वा
चुनावले गर्दा महंगी बढ्न स्क्छ – जनता
नयाँ हाकिम फेरियो काम चुस्त हुनसक्छ – सेवाग्राही

जस्ले जहाँ र जहिले पनि सजिलै व्यक्त गर्न सक्ने भनेकै अनुमान मात्रै हो।
जस्तै –
यो गहकिलो तर्कले मुद्दा जित्न सकिन्छ – वकिल
औषधि चलाएको छु बिरामी बचाउन सकिन्छ – डाक्टर
यसपटक राम्रै पढाएको छु विद्यार्थी सफल हुन सक्छन् – शिक्षक
परिक्षा राम्रै दिएको छु नतिजा भने जस्तो आउनसक्छ – विद्यार्थी

हरेक ब्यक्तिले गर्छन् अनुमान
जस्तो कि –
बिर्खेलाई फसाउन सके मैले चुनाव जित्न सक्छु – नेता
फलानो मिडियाबाट भ्रम छर्न सके हर्केको पार्टी फस्थ्यो – दल
साईलोलाई नंग्याउन पाए म स्थापित हुन्थे – राजनीति

माया प्रेममा पनि अनुमान हुने गर्छ
जस्तै
लुरेलाई फकाउन सके मेरो प्रेम सफल हुनसक्छ – मायालु
फलानोको जोडिलाई फसाउन सके मेरो रिस पूरा हुन्थ्यो – शत्रु
जेठोको घर बिगार्न पाए मेरो चाहना पूरा हुन्थ्यो – छिमेकी

हरेकले हरेक कोणबाट सजिलै व्यक्त गर्ने भनेकै अनुमान मात्रै हो।
यहाँ अनुमानहरुको लामो शृङ्खला ठडिएको छ।
ब्यक्ति बिशेष मात्र नभई संघसंस्था ब्यापारी उद्योगि सबैले गर्छन् अनुमान।
फरक यत्ती हो
कसैले ब्यक्तिगत फाईदा खोज्छन् भने
कसैले सामुहिक फाईदा सोच्छन
कुरो यत्ती हो।