काठमाडौँ । सरकार र उखु किसानबिच सहमति भएको छ । चिनी उद्योगीले लामो समयदेखि उखुको बक्यौता नदिएको भनी केही समयदेखि काठमाडौँमा आई आन्दोलनरत उखु किसान र सरकारबिच आज सम्झौता भएको हो ।
आज गरिएको सम्झौता अनुसार अबको २१ दिनभित्र चिनी उद्योगीले किसानलाई बक्यौता भुक्तान गर्ने व्यवस्था मिलाउन भनिएको छ । यदि बक्यौता भुक्तान नदिएमा कानुनी कारबाही समेत गरिने जनाइएको छ ।
उखु किसानको बक्यौता भुक्तान नगर्ने चिनी उद्योगीको सम्पत्ति रोक्का राख्ने, नगद कारोबार रोक्का राख्ने र थुनुवा पुर्जी जारी भइसकेको लगायतका कारबाही प्रक्रिया समेत सुरु भइसकेको सम्झौतामा उल्लेख गरिएको छ ।
त्यस्तै उखु किसान र चिनी उद्योगीसँग सम्बन्धित अन्य समस्या समाधानका बारेमा अध्ययन गरी सुझाव दिन एक समिति गठन गर्ने सहमति भएको छ । समितिले १२० दिनभित्र सुझाव पेस गर्ने छ । समितिमा उद्योग, वाणिज्य तथा आपूर्ति मन्त्रालयबाट १ जना, गृह मन्त्रालयबाट १ जना, कृषि तथा पशुपन्छी मन्त्रालयबाट १ जना, अर्थ मन्त्रालयबाट १ जना, उखु किसानका प्रतिनिधि ३ जना, चिनी उत्पादकबाट १ जना र उखु किसान सर्घष समितिबाट २ जना प्रतिनिधि गरी १० जनाको समिति बनाउने सहमति भएको छ ।
समितिले चिनी उद्योगी र उखु किसानबिच देखिएका सबै समस्याहरूका बारेमा अध्ययन गरी समस्या समाधानका लागि सुझाव दिने छ ।
यो सम्झौतासँगै लामो समयदेखि आन्दोलनरत उखु किसानको आन्दोलन पनि स्थगित भएको छ ।
फेसबुक देखि प्रतिक्रिया दिनुहोस