सिंहदरबार भित्र पस्ने र निस्कनेको भिड बाक्लै छ
मन्त्रीको गाडी चढ्न नपाएका भोकाहरु
र सिंहदरबारको कुर्सी नभेटेका
अरु घनश्यामहरू
अहिले माइतीघर मण्डलामा रोईरहेका छन् र
किसानका पिठ थमथमाउँदैछन।
सिंहदरबार भित्रीने र बाहिरिने
झन्डावाला चिल्ला गाडी हेरेर
घुटुक्क थुक निलेका उनिहरुले।
त्यहाँ पुग्न किसान आन्दोलन, कृषि क्रान्ति र समाजवादका चर्का नारा लाउँदैछन् ।
सिंहदरबारको कुर्सीमा पुग्ने
अनेक बाटाहरु छन्
नेता भेट्ने
दूतावास धाउने
गुट उपगुटमा बिभाजन हुने र
किसानको आँसुले
किताब लेख्ने ।
एक पछी अर्को गर्दै
क्रान्तिकारी घनश्यामहरु
आईरहे गईरहे
चिल्ला पजेरोमा हुँईकिरहे।
उखुको स्वाद बिर्सिए किसानले तर
घनश्यामहरुका मिठा नारामा भुलिरहे।
पोहोरको घनश्याम अहिले सडकमा बसेर लेख्दैछ समाजवादको किताब।
थाहा छ यो प्रक्रिया निरंतर रहन्छ
अर्को साल किसानहरू
यसरी नै माइतीघरमा रुँदै गर्दा
धर्ना स्थल नजिकै हुनेछ
घनश्यामको समाजवादी पुस्तक बिक्रि कक्ष।
र फेरि अर्को वर्ष
सडकका घनश्यामहरू
किसानका आँसुको दहमाथि झन्डावाल पजेरोमा यसरी नै हुइँकिने छन्।
घनश्याम र पद्माहरु आईरहनेछन गईरहनेछन
किसानहरु यसरी नै रोईरहनेछन।
फेसबुक देखि प्रतिक्रिया दिनुहोस