काठमाण्डाै – चीनको राज्य परिषद्का सदस्य एवं रक्षामन्त्री वेइ फेङहे काठमाण्डौ आइपुगेका छन ।
नेपालको एकदिने औपचारिक भ्रमणका लागि उहाँ काठमाण्डौ आएका हुन ।
एयर चाइनाको विमानमार्फत् त्रिभुवन विमानस्थल ओर्लिएका रक्षामन्त्री वेई विमानस्थलबाट बालुवाटारमा रहेको चिनियाँ दूतावास पुगेका छन ।
एक्काइस सदस्यीय प्रतिनिधिमण्डलको नेतृत्व गर्दै विशेष विमानबाट काठमाण्डौ आएका चिनियाँ रक्षामन्त्री ८ घण्टा बस्ने कार्यक्रम छ । उहाँले राष्ट्रपति विद्यादेवी भण्डारी, रक्षामन्त्रालयको समेत कार्यभार सम्हाल्नुभएका प्रधानमन्त्री केपी शर्मा ओलीसँग दिउँसो बेग्लाबेग्लै शिष्टाचार भेट गर्नुहुनेछ ।
प्रधानसेनापति पूर्णचन्द्र थापासँग द्विपक्षीय वार्ता हुनेछ । परराष्ट्र मन्त्रालयले नेता वेइको यो भ्रमणलाई ‘कार्यगत’ भ्रमण भनेको छ । साथै भ्रमणले नेपाल र चीनबीचको सम्बन्ध अझ सुदृढ हुने परराष्ट्र मन्त्रालयले जनाएको छ ।
चिनियाँ राष्ट्रपति सी चिनफिङको भ्रमणको झण्डै एकवर्षपछि उच्चस्तरमा यो भ्रमण भएको हो । दुई दिनअघि मात्रै भारतीय विदेश सचिव हर्षवर्धन श्रृंगलाले नेपालको भ्रमण गरी स्वदेश फर्किएका थिए । चिनियाँ रक्षामन्त्रीको भ्रमणलाई लक्षित गरेर आज काठमाण्डौको सुरक्षा व्यवस्था कडा पारिएको छ ।
फेसबुक देखि प्रतिक्रिया दिनुहोस