निकै तडकभडक र होहल्ला सहित झन्डै एक अर्ब खर्चेर भित्र्याइएका रेल, भित्र्याएर स्वागत गरेकै दिन देखि थन्काइएको छ। रेल बिना तयारी ल्याइएको हो या अहिले जे भइराखेकोछ त्यसलाइ नै सरकारी शब्दमा भब्य तयारी भनिन्छ त्यो सरकार र रेल बिभागले नै बताउला।
तर, यहाँ विश्लेषण गर्न खोजिएको बिषय भने अलि भिन्न छ। नेपालको इतिहासमा यस प्रकारका भब्य प्रदर्शनहरु भएका छन र जति भब्य भनियो त्यति नै छिटो निकम्बा पनि भएका घटनाहरु छन। उदाहरणको लागि बर्तमान सरकारलाइ नै हेर्न सकिन्छ। झन्डै २ तिहाईको, इतिहासकै शक्तिशाली भनिएको सरकार कति निकम्बा र जनताको नजरमा गिरेकोछ त्यो बताइरहनै पर्दैन।
नेपालका दर्जनौं उद्योगहरु घाटामा देखाउने, जनशक्ति वा कच्चापदार्थको कठिनाइ समेत देखाउने अनि कैयौं बर्ष त्यसै थन्काउने र अन्ततः मेसिनहरु कवाडमा बिक्री गर्ने र जग्गा भुमाफियालाइ बेचेर प्लटिङ गर्ने परम्परा नयाँ होइन। उत्कृष्ट उदाहरणको लागि भृकुटी कागज कारखाना हेर्दा हुन्छ।
अब जाऔं, नयाँ रेलको प्रशंग तिर। यतिबेला रेल बिभाग भन्दैछ “पुरानो सम्झौता थियो त्यसैकारणले ल्याउनै पर्ने भएको हुनाले ल्याइएको हो। कर्मचारी भर्ना गर्न र अन्य प्रक्रिया पुर्याउन अझै ४५-६० दिन लाग्छ।” रेल बिभाग कै अनुसार जम्मा ४५-६० दिन लाग्ने रैछ कर्मचारी भर्ती गर्न, त्यसो भए हिजो रेल आउनु अघि रेल बिभागसंग त्यो ४५-६० दिन थिएन? थियो भने किन बेलैमा कर्मचारी भर्ना गरेन? कि मोटरसाइकल वा अन्य गाडिको जस्तै रेल ल्याएपछी त्यही रेल चलाएर ट्रायल पास गरेर रेलको ड्राइभरको लाइसेन्स निकालेर बल्ल जागीर खाने हो? त्यसो त पक्कै नहोला।
यदि त्यसो होइन भने, के रेललाइ यतिकै छोपेर राख्ने खिया लगाउने अनि खियाले चलेन वा अन्य कारणले बिग्रीएको देखाएर फेरि ८-१० महिनापछि यिनै रेल कवाडको मुल्यमा बेच्ने दाउमा त छैन सरकार र रेल बिभाग? बेलैमा प्रश्न गरौं । त्यो हाम्रो करबाट ल्याइएको हाम्रो सम्पत्ती हो। हाम्रो करबाट तलब सुबिधा खानेहरुले कतै रेल चलाएर भन्दा यतिकै थन्काएर कवाडमा बेचेर फेरि करोडौं कमाउने सपना त बुनिराखेका छैनन?
फेसबुक देखि प्रतिक्रिया दिनुहोस